Folio 112B (verso)

יִמְצָ֣א הָאִ֗ישׁ אֶת־ הנער

הַמְאֹ֣רָשָׂ֔ה וְהֶחֱזִֽיק־ בָּ֥הּ

הָאִ֖ישׁ וְשָׁכַ֣ב עִמָּ֑הּ וּמֵ֗ת

הָאִ֛ישׁ אֲשֶׁר־ שָׁכַ֥ב עִמָּ֖הּ

לְבַדּֽוֹ ׃ ולנער לֹא־ תַעֲשֶׂ֣ה

דָבָ֔ר אֵ֥ין לנער חֵ֣טְא מָ֑וֶת

כִּ֡י כַּאֲשֶׁר֩ יָק֨וּם אִ֤ישׁ עַל־

רֵעֵ֙הוּ֙ וּרְצָח֣וֹ נֶ֔פֶשׁ כֵּ֖ן הַדָּבָ֥ר

הַזֶּֽה ׃ כִּ֥י בַשָּׂדֶ֖ה מְצָאָ֑הּ

צָעֲקָ֗ה הנער הַמְאֹ֣רָשָׂ֔ה

וְאֵ֥ין מוֹשִׁ֖יעַ לָֽהּ ׃ס

כִּֽי־ יִמְצָ֣א אִ֗ישׁ נער

בְתוּלָה֙ אֲשֶׁ֣ר לֹא־ אֹרָ֔שָׂה

וּתְפָשָׂ֖הּ וְשָׁכַ֣ב עִמָּ֑הּ

וְנִמְצָֽאוּ ׃ וְ֠נָתַן הָאִ֨ישׁ

הַשֹּׁכֵ֥ב עִמָּ֛הּ לַאֲבִ֥י הנער

חֲמִשִּׁ֣ים כָּ֑סֶף וְלֽוֹ־ תִהְיֶ֣ה

לְאִשָּׁ֗ה תַּ֚חַת אֲשֶׁ֣ר עִנָּ֔הּ

לֹא־ יוּכַ֥ל שַׁלְּחָ֖ה כָּל־ יָמָֽיו ׃ס

לֹא־ יִקַּ֥ח אִ֖ישׁ אֶת־

אֵ֣שֶׁת אָבִ֑יו וְלֹ֥א יְגַלֶּ֖ה כְּנַ֥ף

אָבִֽיו ׃ס לֹֽא־ יָבֹ֧א פְצֽוּעַ־

דַּכָּ֛א וּכְר֥וּת שָׁפְכָ֖ה בִּקְהַ֥ל

יְהוָֽה ׃ס לֹא־ יָבֹ֥א מַמְזֵ֖ר

בִּקְהַ֣ל יְהוָ֑ה גַּ֚ם דּ֣וֹר

עֲשִׂירִ֔י לֹא־ יָ֥בֹא ל֖וֹ בִּקְהַ֥ל

יְהוָֽה ׃ס לֹֽא־ יָבֹ֧א עַמּוֹנִ֛י

וּמוֹאָבִ֖י בִּקְהַ֣ל יְהוָ֑ה גַּ֚ם

דּ֣וֹר עֲשִׂירִ֔י לֹא־ יָבֹ֥א לָהֶ֛ם

בִּקְהַ֥ל יְהוָ֖ה עַד־ עוֹלָֽם ׃

עַל־ דְּבַ֞ר אֲשֶׁ֨ר לֹא־ קִדְּמ֤וּ

אֶתְכֶם֙ בַּלֶּ֣חֶם וּבַמַּ֔יִם בַּדֶּ֖רֶךְ

בְּצֵאתְכֶ֣ם מִמִּצְרָ֑יִם וַאֲשֶׁר֩

שָׂכַ֨ר עָלֶ֜יךָ אֶת־ בִּלְעָ֣ם בֶּן־

בְּע֗וֹר מִפְּת֛וֹר אֲרַ֥ם נַהֲרַ֖יִם

לְקַֽלְלֶֽךָּ ׃ וְלֹֽא־ אָבָ֞ה יְהוָ֤ה

אֱלֹהֶ֙יךָ֙ לִשְׁמֹ֣עַ אֶל־ בִּלְעָ֔ם

וַיַּהֲפֹךְ֩ יְהוָ֨ה אֱלֹהֶ֧יךָ לְּךָ֛ אֶת־

הַקְּלָלָ֖ה לִבְרָכָ֑ה כִּ֥י אֲהֵֽבְךָ֖

יְהוָ֥ה אֱלֹהֶֽיךָ ׃ לֹא־ תִדְרֹ֥שׁ

שְׁלֹמָ֖ם וְטֹבָתָ֑ם כָּל־ יָמֶ֖יךָ

לְעוֹלָֽם ׃ס לֹֽא־ תְתַעֵ֣ב אֲדֹמִ֔י

כִּ֥י אָחִ֖יךָ ה֑וּאס לֹא־

תְתַעֵ֣ב מִצְרִ֔י כִּי־ גֵ֖ר הָיִ֥יתָ

בְאַרְצֽוֹ ׃ בָּנִ֛ים אֲשֶׁר־ יִוָּלְד֥וּ

לָהֶ֖ם דּ֣וֹר שְׁלִישִׁ֑י יָבֹ֥א לָהֶ֖ם

בִּקְהַ֥ל יְהוָֽה ׃ס כִּֽי־ תֵצֵ֥א

מַחֲנֶ֖ה עַל־ אֹיְבֶ֑יךָ וְנִ֨שְׁמַרְתָּ֔

מִכֹּ֖ל דָּבָ֥ר רָֽע ׃ כִּֽי־ יִהְיֶ֤ה בְךָ֙

אִ֔ישׁ אֲשֶׁ֛ר לֹא־ יִהְיֶ֥ה טָה֖וֹר

מִקְּרֵה־ לָ֑יְלָה וְיָצָא֙ אֶל־

מִח֣וּץ לַֽמַּחֲנֶ֔ה לֹ֥א יָבֹ֖א אֶל־

תּ֥וֹךְ הַֽמַּחֲנֶֽה ׃ וְהָיָ֥ה לִפְנֽוֹת־ עֶ֖רֶב

יִרְחַ֣ץ בַּמָּ֑יִם וּכְבֹ֣א הַשֶּׁ֔מֶשׁ יָבֹ֖א אֶל־ תּ֥וֹךְ

הַֽמַּחֲנֶה ׃ וְיָד֙ תִּהְיֶ֣ה לְךָ֔ מִח֖וּץ לַֽמַּחֲנֶ֑ה וְיָצָ֥אתָ שָׁ֖מָּה